Ua sauni atu nei le ‘aulakapi a tama’ita’i Samoa, le Manu Sina i le latou taaloga ma le ‘au malosi a le Iunaite Setete, ina ua mavae ai le latou taaloga ma le Numera tasi i le lalolagi i ‘au a tama’ita’i, le ‘au a Egelani.
O le taaloga faai’u foi lea a le Manu Sina i le latou Pool o loo iai, ma o le Aso Toonai nei e faia ai lea taaloga ma le ‘au a le USA i le malae i York.
O se lipoti mai le faia’oga o le ‘au, Mataafa Ramsey Tomokino na ia ta’ua ai, e ui lava i le malosi o le ‘au a Egelani, ae sa finau malosi tama’ita’i o le Manu Sina ma ua avea lena taaloga ua atili faaopoopo ai le malosi i teine taaalo.
E ui lava e pei ona saunoa Tomokino atonu o Egelani lava le ‘au o loo tilotilo uma iai le to’atele e ono siamupini i le Ipu a le Lalolagi o loo faagasolo nei, ae mo le Manu Sina, o le latou taula’iga ina ia faatumauina pea le malosi ma le taalo finau o tama’ita’i uma o ‘au a le Pasefika.
A o sauni atu la le Manu Sina i le latou taaloga ma le US, o loo manino le latou fe’au taumomoli: Finau se’ia oo i le tini, taalo faatausala, ma sa’ili ma pu’e avanoa e ono faia ai se mea sili ona mata’ina pe a latou tataoina se ulua’i sikoa i le latou taamilosaga o le Ipu a le Lalolagi.
E momoli atu ai foi faamanuiaga a le tapuaiga a Samoa i Niu Sila nei ma le lalolagi aoao i le latou ‘au a tama’ita’i le Manu Sina a o alo atu i le latou taaloga i le Aso Toonai nei.
