Fai mai lipoti lata mai a le CNN o loo fetuuna’i nei e Isaraelu le ave faamalosia o nisi o vaega o loo nofoia o le West Bank e pei ona saunoa ai ni sui se to’atolu o Isaraelu, ae o le taimi foi lenei ua aga’i atu atunuu i Sisifo o le lalolagi e amana’ia ma faatāua le setete o Palesitina i le masina lenei o Setema.
O se tasi lenei o laasaga o loo vaavaai iai Isaraelu e tali atu ai i le amana’ia e atunuu o le Palestinian statehood, atunuu e pei o Farani, Ausetalia, Kanata, Potukale ma le United Kingdom lea o le a faaopoopo atu i le isi silia ma le 140 atunuu o le a o latou amanaiaina foi le setete o Palesitina.
Ua lipotia sa faia se faatalanoaga a Netanyahu ma lana faigamalo i le mataupu lea i le vaiaso talu ai ae le’i taunuu i se faai’uga.
O le West Bank na maua e Isaraelu mai ia Jordan i le 1967 i le taua na faia ai ma amata mai ai loa ona nofoia e tagata Isaraelu ia nofoaga e ui sa solia ai tulafono faavaomalo.
O loo manana’o la Palesitina i le West Bank, le itu i Sasa’e o Ierusalema atoa ai ma le Gaza Strip ma ua to’atele komiuniti faavaomalo ua lagolago atu iai.
Ua faailoa i le lipoti lava lea o le ave faamalosia e Isaraelu o vaega ua nofoia i le West Bank o le a vaaia o se gaioiga solitulafono i lalo o tulafono faavaomalo ma e ono tula’i mai ai foi nisi vesiga ma o loo tulimata’ia la e le to’atele le isi gaioiga o le a sosoo ai a Isaraelu.
Puna o Faamatalaga: https://edition.cnn.com/i2025/09/01/middleeast/israel-west-bank-annexation-palestinian-state-intl
