Ua lipotia le tafana ane e le militeli a Isaraelu o ni uāfana i se aumalaga mai Europa ma le Atu Alapi o loo iai i sa latou malaga aloa’ia i le nofoaga e lata i le Jenin Refugee camp i le West Bank.

Fai mai le CNN o le aumalaga lea e aofia ai sui mai atunuu e 20 e aofia ai le UK, Farani, Kanata ma isi, o loo iai i sa latou malaga aloa’ia e mata’itū le tulaga o iai nofoaga ia i le West Bank ma ona si’omaga.

O loo iai videos o le taimi na tafana ane ai le aumalaga lea e fitafita a Isaraelu.

Ua faailoa i se pepa o faamatalaga mai le matāgaluega o le va i fafo a Palesitina e tuua’ia le matāupu lenei i le faigamalo a Isaraelu.

Ua ta’ua i le lipoti se faamatalaga mai le vaega’au o le puipuiga a Isaraelu le Defense Force ua ta’ua ai o le nofoaga sa aga’i atu iai le aumalaga o loo faia nei iai a latou osofa’iga faamiliteli ma ua faia nei se su’esu’ega ina ua faato’ā manino o le kulupu sa aga’i ane o se aumalaga aloa’ia faavaomalo.

Mai se sui o Malo Aufaatasi ua ia ta’ua i le lipoti na te teena faamatalaga mai ia Isaraelu e lē o atagia lelei ai le mea na tupu.

Ua tau fai faailoa e minisita o le va i fafo a atunuu sa iai o latou sui i lea aumalaga o le a talanoa atu i amepasa o Isaraelu i o latou atunuu ina ia faia vave se su’esu’ega i lenei matāupu ma lipoti ane pe aisea na faatino ai e le militeli a Isaraelu lea gaioiga.

Puna o Faamatalaga: https://edition.cnn.com/2025/05/21/middleeast/diplomats-israeli-fire-west-bank-intl