Ua faailoa e le Palemia o Isaraelu o Benjamin Netanyahu e lē taumate ua o latou fasiotia le ta’ita’i o le Hamas o Mohammed Sinwar i osofa’iga i Gaza.
Faailoa i lipoti mai le CNN i le asō le faamatalaga lea a le Palemia ma ta’ua ai e faitau afe le aufaatupu faalavelave ua o latou faaumatia ma ta’ua ai ma le tulaga lea e faatatau i le ta’ita’i o le Hamas, Mohammad Sinwar.
Afai ae faamaonia lea tulaga o lona uiga o se aafiaga ogaoga lea i fuafuaga a le Hamas.
O Sinwar o le uso o le ta’ita’i sa iai o lea vaega o Yahya Sinwar na fasiotia foi i osofa’iga a Isaraelu i Gaza i le tausaga na te’a nei.
O loo faatalia se tali ane a le Hamas i lea faaaliga mai le ta’ita’i o Isaraelu.
Ua saunoa foi Netanyahu o soo se tasi e valaau atu ia Isaraelu e taofia ana osofa’iga ae le’i ausia le faamoemoe o loo latou tulimata’ia, o lona uiga ua valaau atu ia i latou e tuu pea le Hamas e fai lona malosi.
Ua ta’ua e le alii Palemia e iai le aiātatau a Isaraelu e puipuia ai ona tagata mai soo se pulega o loo faamata’u atu.
Puna o Faamatalaga: https://edition.cnn.com/2025/05/21/middleeast/mohammed-sinwar-probably-killed-israel-claims-latam-intl
