O le vaiaso lenei ua mae’a ai le lua vaiaso o le tuuaga mo a’oga uma i le atunuu o le kuata lona lua faalea’oa’oga, peita’i o le a faaauau ona mālōlō fanau o a’oga faata’ita’i, ma a’oga tulagalua i le itumalo o le Vaimauga 1 ma le Vaimauga 2, o Faleata 1 ma Faleata 2, o Sagaga faapea ai itumalo palota o Aana 1 ma Aana 2.
Ua mafua lea faai’uga a le matāgaluega o a’oga a le malo ona o nofoaga i totonu o ia itumalo o loo pito malosi ai le pepesi o le fiva ponaivi poo le dengue fever.
O fanau i le Vasega 1 i le Vasega 7 i a’oga tulagalua o le a mālōlō pea ae o fanau i le vasega tausaga 8 o le a a’e faapea ai ma fanau i a’oga maualuluga mo ia itumalo.
Ua faaalia i se faasalalauga mai le matāgaluega o a’oga ma aganuu, o le faaauau o le mālōlōga poo le a’e mo fanau i a’oga tumaoti ma a’oga a ekalesia o le a taatia atu ia i latou o iai pulega o ia a’oga e faia e latou le faai’uga.
O le masina o Aperila o le tausaga nei na faailoa aloaia ai le pepesi o le fiva o ponaivi ma o loo faaauau pea lea tulaga i le taimi nei, a o toe fautuaina ai le atunuu i auala o puipuiga e taofia ai le pepesi o lea faama’i e feavea’i e iniseti o le namu le vairusi.
