O tama’ita’i o alala i Samoa ma atunuu e pei o Amerika, Niu Sila ma Ausetalia ua filifilia i le ‘ausoka a tama’ita’i i le matutua e i lalo o le 17 tausaga poo le Under 17, o le a tausinio i le taamilosaga o le Ipu o le Lalolagi i lea matutua o tama’ita’i, o le a faia i le atunuu o Morrocco i le va o le aso 17 o Oketopa ma le aso 8 o Novema o le tausaga nei.
O le faailoa ai o suafa o le ‘au ua filifilia mo lea taamilosaga a le lalolagi i le taaloga soka, o se mitamitaga lea i le pulega o lea taaloga i Samoa ona o se taimi muamua lenei, ua ausia ai i le atina’e o le soka i lo tatou atunuu sea tulaga lelei ma maualuga.
Ua faailoa i se lipoti e le Pelesetene o le taaloga soka i Samoa, sa leai se manatu e ausia i lenei taimi sea tulaga maualuga, ma o le agaga faafetai lea i mātua ma aiga o alo tama’ita’i o le atunuu o faamautū mamao ona o le agaga lagolago ma le lotonuu i le avea ma avefu’a a Samoa i le lalolagi o le taaloga soka.
O le atunuu o Korea i Saute o loo umia le ipu o le siamupini o le Ipu o le Lalolagi i le soka mo ‘au a tama’ita’i e i lalo o le 17 tausaga le matutua.
