O Samoa ma Niu Sila lea ua faamaonia o le a tauva i le 2026 FIFA under 17 Women’s World Cup poo le Ipu o le Lalolagi i le itupa o tama’ita’i i lalo o le 17 tausaga le matutua i le taaloga o le soka.
Ua mautū lea tulaga i le mae’a o taaloga semi finals na faia i le aso ananafi i Apia.
Na manumālō Samoa ia Solomona i ‘ai e 5-0 ae manumālō Niu Sila ia Niu Kaletonia i le isi semi final, 4-2.
O lona uiga la ua sao uma ‘au ia e lua i le sa’iliga o le siamupini mo le taamilosaga i Apia ae ua faailoa le agaga fiafia o pulega a ‘au e lua ua faafetaia ai le sao o le ‘autaaalo aemaise foi le amana’ia o le faiva o le ‘autapua’i.
O Niu Kaletonia ma le Atu Solomona o le a fetaui i le Aso Tofi o le vaiaso nei e sa’ilia le tulaga tolu o le taamilosaga a o le’i faia le finals o lea taamilosaga le OFC Under 16 Women’s Championships.
O Morocco e faia ai le Ipu o le Lalolagi i le soka i le tausaga fou.
Puna o Faamatalaga: https://www.rnz.co.nz/international/pacific-news/569703/samoa-nz-off-to-under-17-fifa-world-cup
