O le lipoti aupito lata mai mai le Matāgaluega o le Soifua Mālōlōina i Samoa e pei ona faailoa e le Leitio Faavaomalo a Niu Sila, ua ta’ua ai ua faaitiitia le aofa’i o tagata aafia i le dengue fever pe a faatusa i le vaiaso ua tuana’i.
Ta’ua e le Matāgaluega e oo mai i le aso 25 o Aokuso o le Aso Gafua lea o le vaiaso nei, ua lata i le 3,379 tagata ua faamaonia mai le potu su’esu’e le aafia i le fiva ponaivi peita’i ua maitauina ua faaitiitia le tulaga faatupula’ia o le faama’i.
Ua faaitiitia tagata na aafia i le vaiaso mai le aso 18-24 o Aokuso pe a faatusa i le vaiaso i luma atu ma ua faailoa foi e le matāgalulega o le 86 pasene o tagata aafia i le falema’i e mai le motu o Upolu.
E to’aono ua maliliu e mātele i alo ma fanau, e 184 isi gasegase na taofia i maota gasegase i Upolu ma Savaii mai lea aofa’iga e 129 ua toe tete’a i tua.
Ua iai le faasilasilaga mai le matāgaluega o a’oga a le atunuu e toe amata a’oga a le fanau i le vaiaso o muamua ma o le a leai se tuuāga e pei ona masani ai mai ia Setema aga’i ia Oketopa se’i vaganā le aso mālōlō o le Lotu Tamaiti i le aso 13 o Oketopa.
Puna o Faamatalaga: https://www.rnz.co.nz/international/pacific-news/571314/samoa-dengue-cases-reach-nearly-11-000-but-cases-drop-compared-to-previous-week
