Ua faamalosia atili le ‘au a Samoa i le lakapi liki, le Toa Samoa i le auai atu o se tasi o alo o le atunuu Payne Haas e tuu atu lana lagolago i le ‘au e pei ona faamaonia i lipoti a le RNZ.
Sa faia se feiloa’iga a Haas ma le ‘autusitala i Brisbane ma ia faailoa ai lana faai’uga e taalo mo Samoa.
Sa faamatala ai e le alii taalo se tasi taimi sa taaalo ai Samoa ma Ausetalia a o taalo atu mo Ausetalia, sa ia faalogo i le tāina o vii o fu’a a atunuu e lua ma ia toe tomānatu ai i le taimi sa faapepese ai i latou e lona tinā i le vii o le fu’a a Samoa, ma e pei o i sa afua mai ai lava lona naunauta’iga e taalo mo Samoa ma fai ma sui o le aiga o si ona tinā le Taufua family aemaise ona e tāua ia te ia lona aiga ma le aganuu.
O Payne Haas mai le Brisbane Broncos o le Samoa, Swiss ma Filipino ma ua talia lelei e le faia’oga o le ‘au, Ben Gardiner lana faai’uga ma faafetaia foi lea alo o Samoa i lona faamuamua o lona atunuu.
O le aso 19 o Oketopa e taaalo ai Samoa ma Niu Sila i Aukilani e amata ai le Pacific Championships.
Puna o Faamatalaga: https://www.rnz.co.nz/international/pacific-news/570358/payne-haas-changes-allegiance-to-samoa-ahead-of-next-year-s-rugby-league-world-cup
