O loo i Aukilani Niu Sila le Palemia o Samoa, afioga Fiame Naomi Mataafa mo le fonotaga a le Iunivesite o le Pasefika o loo faagasolo ai i le vaiaso nei ma o se faatalanoaga ma le RNZ ua ia ta’ua ai o se taimi o lu’itau mo le itulagi o le Pasefika ma ona ta’ita’i aemaise i le tau fai sa’ili mai o avanoa o isi atunuu ma lo latou auai ai i le Pasefika.

Na faamaonia ane e le tamaitai Palemia i le leitio faasalalau o le iloiloga le Review of the Regional Architecture (RRA) o loo ta’ita’ia e le Pacific Island Forum, ua iai i lona vaega mulimuli i le faatalanoaga.

O le RRA e auga tonu i le faamautūina o pulega faaitulagi ina ia talafeagai ma le mafua’aga na faia ai, e aogā ma tali i mana’oga o tagata i atumotu o le Pasefika.

Ta’ua e Fiame i le lipoti lava lea, o le tali atu lea a ta’ita’i o le Forum i le faaopoopo pea o le aofai o ana paaga o loo fia maua ni avanoa i le laulau mo faiga filifiliga a le itulagi.

Na fesiligia foi le Palemia i sona finagalo poo iai pea se tasi i le Pasefika, ma ia ta’ua ai o loo iai le tali o loo iai peita’i a oo ina faatino, o loo iai tulaga o loo taofi eseese ai. 

Na faailoa foi i le saunoaga a le tamaitai Palemia i le lipoti lava lea o le a lē toe tula’i mo le vaega faaupufai a le FAST i se palota i le lumana’i ae mo le aga’i i luma, ae lē o se isi faamalu e ese mai poo le tuto’atasi foi, ma e le’i faia se faai’uga i le tulaga lea i le taimi nei.

Puna o Faamatalaga: https://www.rnz.co.nz/international/pacific-news/561781/every-man-and-his-dog-is-coming-samoan-pm-warns-of-growing-geopolitical-interest-in-pacific