Ua momoli le faamalo a le ulua’i Palemia tama’ita’i o Samoa, afioga Fiame Naomi Mataafa i le Palemia filifilia o le atunuu ua iai, le susuga i le Laaulialemalietoa Leuatea Polataivao Fosi Schmidt, talu ona mae’a le faigāpalota a le atunuu.
Ta’ua e le RNZ o le saunoaga a Fiame sa faasalalauina faapitoa i le televise ma ua ia faafetaia ai foi le atunuu o Samoa mo lo latou onosa’i aemaise sa ia faafetaia foi le Atua i lona alofa ma lona filemu i le atunuu a o faagasolo ai fuafuaga o upufai o malo.
Faailoa e le Sa’ofaapito, e tāua leo o tagata ma o le faai’uga ua o latou faia i le palota na se’i mavae atu nei ua faatutū mai ai o latou sui i le Palemene mo le isi lima tausaga.
Ua mae’a tuuina ane foi le faamaoniga mai le Ao o le Malo o Samoa o le Aso Lua o le vaiaso fou le ulua’i saofa’iga a le Palemene lona 18 a le atunuu, ma o le a faatauto ai foi ma sui usufono uma ua filifilia mai e itumalo faapalota e 51 o le atunuu e ala i lana faigāpalota na faatino i le aso 29 o Aokuso 2025.
O le sau ai o lenei fe’au faamanuia a lē sa avea ma Palemia o le paea’iga talu ai, ua sosoo atu ai i fe’au faamanuia mo le Palemia filifilia mai isi foi ta’ita’i o malo e pei o le Palemia o Niu Sila, Christopher Luxon, le Palemia o Ausetalia, Anthony Albanese, ma le Sui Palemia o Niu Sila, Winston Peters e pei ona faasalalauina i luga o fesoota’iga televavave i le vaiaso talu ai.
Puna o Faamatalaga: https://www.rnz.co.nz/international/pacific-news/572538/thank-you-samoa-fiame-congratulates-prime-minister-elect-laauli-leuatea-schmidt
