O nisi o aiaiga sa faatonu folau ai le galuega a tusitala ma le aufaasalalau i le faalauiloaina o taualumaga o faigāpalota a le atunuu ua mavae, aemaise lava i le palota tele mulimuli i le tausaga e 2021, ua faafaigofie nei ina ua toe fetuutuuna’i i le va o le ofisa o le komisi o faigāpalota ma le faalapotopotoga poo le asosi o tusitala ma le aufaasalalau a Samoa.
O se tasi o aiaiga sa ilitata iai lea galuega o le 100 mita o le mamao i le va o le falepalota ma le vaega e tu atu ai le pu’eata ma se tusitala e faatino le galuega.
O lea ua tuu mai i lalo i le 50 mita le mamao ma ua malilie iai le asosi ma le ofisa o le komisi o faigāpalota.
Ua iai ma nisi o aiaiga ua toe fetuutuuna’i i le autū ia faafaigofie le galuega a tusitala ma le aufaasalalau.
Ua sainia ai ma se maliega poo se Memorandum of Understanding le M.O.U e faamautū ai lea suiga i le faamoemoe e saga faaleleia atili le mafutaga a le asosi ma lea auaunaga tāua a le Malo i le lumana’i.
Finagalo o le Komesina o faigāpalota le afioga Toleafoa Tuiafelolo Alexander John Stanley ma le Pelesetene o le asosi o tusitala ma le aufaasalalau a Samoa le tama’ita’i o Taliilagi Keresoma i le mae’a sainia o le maliega.
