Ua faaaogā e leoleo i Saina, neti ma spray mo iniseti faapea foi ma drones e tetee atu ai i namu o loo feavea’ia le siama poo le vairusi o le chikungunya lea ua aafia ai le faitau afe o tagata.
Ua lipotia mai e le CNN o le faamatalaga mai Saina ua silia i le 7 afe ua aafia i le vairusi lea se’ia oo mai i le aso ananafi ae mātele lava i le itu i Saute o le aai o Foshan i Saina lea e to’atele ai tagata aafia, e tusa lea ma le 170 km mai Hong Kong.
Fai mai le lipoti e foliga o se tulaga ese lea le maualuga o le numera o tagata ua aafia i le vairusi lea o le chikungunya ua faamauina i Saina.
O le vairusi e feavea’i e namu ma o āuga e aofia ai le fiva ma le tigā o sooga o ponaivi o le tino.
Ua vaaia i ata i luga o televise a Saina, le ‘aufaigaluega o loo spray nofoaga faitele i aai i faga iniseti ae faapea foi i fale o aiga.
Ua faailoa foi o timuga mamafa ma le vevela ua atili faatetele ai le pepesi o le vairusi ma ua faaaogā ai ma drones e sa’ilia ai nofoaga o loo faapunafanau ai namu ina ia faatama’ia.
Ua faailoa foi e leoleo e ono faasalaina tagata e lē faamamāina ma sasaa ese vai mai fafo o o latou fale.
O nisi faasalaga e ono aofia ai ma le tapē atu o le latou eletise pe a faaauau pea ona lē usita’ia fautuaga.
Ona o lea vairusi ua tuuina ai ma se lapata’iga a Amerika i ona tagata ina ia faaeteete pe afai e faimalaga i Saina aemaise i le itumalo o Guangdong.
Puna o Faamatalaga: https://edition.cnn.com/2025/08/06/asia/china-mosquito-chikungunya-virus-latam-intl
