O le afā malosi poo le typhoon o Ragasa lea sa aafia ai le Atu Filipino i le aso ananafi, ua aga ane nei mo le itu i Saute o Saina ma ua lipotia le malolosi o ona matagi ma timuga mamafa.
Ua lapata’ia ai nei faaitu i lea itu o Saina ina ia mataala ma ua faalēaogāina foi ma faigāmalaga atoa ma a’oga ma pisinisi ua tapunia.
Fai mai e faitau miliona tagata o loo aumau i faaitu o loo aga’i atu iai le afā ma ua lipotia foi e ono aafia Hong Kong, Macau, Shenzhen ma Guangzhou a o le’i faasolo atu i le itumalo o Guangdong.
Ua faailoa i le lipoti a le CNN e iai faamatalaga mai Hong Kong ua ta’ua ai a itiiti mai pe to’aono o loo manunu’a ona o sologa eleele aemaise laau to’ulu.
Fai mai le vaaitau o loo faasolo pea aga’i i le itu i Sisifo le afā o Ragasa ae ina ua aafia le Atu Filipino i le aso ananafi, ua faamatalaina i lipoti e oo i le 165 maila i le itula le malolosi o matagi, lona uiga ua faatulaga faatasi ma se afā i le vaega lima poo le Category 5.
I Taiwan o loo lipotia le maualuluga o galu ma matagi malolosi, a itiiti mai e to’alua tagata ua maliliu, 28 le ‘au manunu’a ma le 30 o loo tau sa’ilia.
E tele mea ua faaleagaina foi i le Atu Filipino.
Puna o Faamatalaga: https://edition.cnn.com/2025/09/22/asia/typhoon-ragasa-china-guangdong-hong-kong-intl-hnk
