Ua savalia nei le fā aso talu ona aumai faalaua’itele e le Matāgaluega o Leoleo, Falepuipui ma le Toe Fuata’ina se faasilasilaga i le atunuu ua faailoa ai ata o ni alii se to’alua o ni tagatānuu o le atunuu o Vietnam o ni seila o se vaa fagota o loo taula i le uafu tele i Apia.
O le aso 4 o Iulai na taunuu ai le vaa fagota i lo tatou taulaga ae aso 9 o le masina lava lenei lē toe maua se faamatalaga poo fea o iai ia alii seila e to’alua, o le isi e 32 tausaga le matua o lona igoa o Hoa Nguyen Van, ae o le alii o Thao Vo Dinh e 22 tausaga le matua.
Ua ta’ua e se tasi o lipoti o loo taofia le tuua o Samoa e le vaa fagota o le Oryong 306 se’ia vaganā ua maua ia alii seila.
