Ua i luma nei o le Faamasinoga Maualuga a le atunuu se talosaga a le Loia Sili a le Malo ua autū i le fia maua o se finagalo o le faamasinoga i le taotoga o se ālafua mo taimi e su’esu’e ma iloilo ai ni talosaga o le a faaulu, e fesiligia ai le tulaga agavaa o tagata palota ua mae’a ona lesitala, faapea ma sui faatutū.
O se tasi lea o vaega tāua i tapenaga a o lumana’i se palota a le atunuu e filifili ai sui usufono o le Palemene, peita’i ua faailoa e le tama’ita’i Palemia o le malo tausi i le feiloa’iga ma tusitala, ua mafua ona ave lea talosaga a le Loia Sili i le faamasinoga ona o le taimi ua faia faafuase’i ai le palota aoao, e lē o talafeagai ma taimi sa masani ona faato’ai ai ni talosaga i le faamasinoga mo se su’esu’ega o ni lu’i faaletulafono e fesiligia ai le agavaa o ni sui tauva faapea ma ni tagata palota ua lesitala i se itumalo faapalota.
E le’i faailoaina se aso ua faatulaga e silasila ai le Faamasinoga Maualuga i lea talosaga mai le Loia Sili a le malo.
