O le vaiaso lenei o le a feiloa’i ai le Minisita o A’oga ma Aganuu ma le Ofisa Sili o Pulega, o lana Matāgaluega e fofola iai lana fuafuaga mo le 12 masina o lumana’i, i se taumafaiga e sa’ili auala e faaleleia ai fa’afitauli o le faitautusi ma le a’oa’oina o le numera mo fanau a’oa’oina a Samoa.
‘O le saunoaga a le Minisita o Aoga ma Aganuu le afioga Aiono Alec Ekeroma i le faatautoga o le suiga fou lona 95 o alii ma tama’ita’i pisikoa mai Amerika, na ia faailoa ai lea tulaga ma lana saunoaga o se tasi lea o ana manulautī i le lima tausaga o le faigāmalo ua seei ai i le tofi Minisita mo lea matāgaluega tele a le malo, o le siitia o le maka poo togi e pasi ai fanau mai a’oga tulagalua e oo i a’oga maualuluga ma le Iunivesite Aoao a le atunuu.
Sa faailoa ai foi e le Minisita le tasi o lu’itau o le a feagai ma le faigāmalo; o le sa’ili seleni e faatupe ai nisi o folafolaga a le latou patī faaupufai o le Faatuatua i le Atua Samoa ua Tasi, e faatino ai le a’o’oga fua o fanau mai a’oga amata, o a’oga tulagalua, kolisi ma le iunivesite; aemaise o le faatupeina o le polokalame o taumafa poo school lunches mo a’oga tulagalua uma a le malo.
E to’a 12 pisikoa Amerika o faia’oga o le a galulue i a’oga tulagalua ua filifilia iai, ma o le tasi o matāupu o le a mamafa iai a latou a’oa’oga o le faitautusi ma le numera poo le matematika.
Le afioga i le Minisita o A’oga ma Aganuu, afioga Aiono Alec Ekeroma.
