O le oo atu o Papalii Sia Figiel i se tasi o ona tauaiga i Lotofaga i le Aso Toonai 25 o Me o le tausaga na te’a nei 2024, o le avanoa lea sa ia faailoa ai i le tinā o Amituanai Dr Cecilia Alailima le gaioiga sa ia faia i le tama’ita’i polofesa o Dr Caroline Sinavaiana Gabbard.
Na faailoa e Amituanai i lana molimau i le faamasinoga, o le taeao lea o le Aso Toonai na ia vaaia ai le afe atu o le taavale na te lē iloa poo ai o alu atu ai.
Ae ina ua taunuu atu sa ia vaaia o Papalii Sia o loo alu atu ai.
O le taavale lea o le meatotino a lē na fano le soifua i le gaioiga solitulafono ua tuua’ia ai nei le tama’ita’i tusi solo ma tala fatu.
Na tofā ai lē ua molia i le fale o Amituanai ae o le malama o le taeao o le Aso Sa, 26 o Me 2024 na sauni ai le aiga e o i le lotu.
O tapenaga ia na amata i se mālū o le taeao ae o le avanoa lea na faailoa ai e Papalii Sia i le molimau e iai se mea o loo fia talanoa ai.
Na faailoa ai e lē ua molia lana gaioiga ma lana tala, o lana uo sa la fai’aiga i le aoauli o le Aso Faraile sa iai se mea na ita ai.
Sa faailoa e lē ua molia e pei ona faamatala Amituanai i lana molimau sa faailoa atu e Papalii Sia lona faaaogā o se samala.
Sa faailoa ai foi e lē ua molia na mae’a le gaioiga na ia faia ona ia tuua lea o lo latou fale i Vaivase uta ae o loo iai lē sa ia faia iai le gaioiga.
Sa ia faamatala ai foi sa ia loka uma le fale ae alu ese.
A o faamatala ia tulaga e Papalii Sia e pei ona faailoa i le molimau a Amituanai sa faailoa ai foi e lē ua molia lona mafaufau i se gaioiga na te faamuta ai lona ola, ae sa faufautua iai Amituanai e lē o se gaioiga tatau lea tulaga.
O le faailoa ai o ia tulaga na tutupu na fautuaina ai loa e le tinā o Amituanai lē ua molia o le a logo leoleo i le ofisa i Apia.
O le logoina lea o leoleo na malaga mai ai le molimau ma lona to’alua faatasi ma lē ua molia i le ofisa o leoleo i Apia ma fai ai lana faamatalaga.
O le Aso Faraile lenei ua faaauau ai lenei faamasinoga i le molimau a se foma’i o le mafaufau mo le itu a Papalii Sia Figiel.
O loo tetee lē ua molia i tuua’iga ma moliaga uma a leoleo.
