O le a lē mafai lava e Peretania ona faamatuu atu lana tagāvai poo le fu’a a le atunuu ia i latou o loo manana’o e faaaogā le fu’a e fai ma faailo o gaioiga sauā, faafefe tagata ma feeseesea’iga.
O le faamatalaga lea mai le Palemia o Peretania, Kier Starmer.
Fai mai le Palemia o le fu’a a lona atunuu e faailoa ai tulaga eseese o le atunuu ma o le a lē mafai ona ia faataga tagata e maua i ni lagona e faamāina ai ona o o latou tala’aga faapea foi ma le lanu o o latou tino.
Ua faia ia faamatalaga a Starmer i le mae’a o le solo tetee tele e silia ma le 150 afe tagata na aofia ai i le ogatotonu o Lonetona, savavali ai mo le faamoemoe e tuufaatasi le atunuu, Unite the Kingdom.
Fai mai Starmer e iai le aiā tatau a tagata e faailoa ai lo latou tetee filemu i matāupu ma e tāua tele lea i talitonuga o le atunuu.
Peita’i e lē mafai ona faataga ia tulaga e osofa’i ai e nisi malu o le malo mai le faatinoina o o latou tiute.
Fai mai e 26 malu o le malo na manunu’a i le aso lea na faia ai le savali ma le to’a 24 o tagata na pu’e e leoleo.
Saunoa Starmer o Peretania e mitamita i ana tu o le onosa’i, eseese uma o ona tagata ma le faaaloalo ma o le latou fu’a e atagia ai ia tulaga ma e lē mafai ona faamatuu atu le tagāvai i tagata latou te faaaogā le fu’a e atagia atu ai faailo o sauāga, faiga faamata’u ma feeseesea’iga.
Puna o Faamatalaga: https://www.bbc.com/news/articles/c3vz91x5ynzo
