A o faafeiloa’i aloa’ia atu e le Aigatupu a Peretania le taunuu ane o le Peresetene o Amerika, Donald Trump i o latou laufanua, ae ua vaaia foi le tali ane a nisi o tagata Peretania i lea faigāmalaga.
Fai mai le CNN e eseese uma taga ma amioga faaalia a tagata Peretania i le taunuu atu o Trump, o le to’atele ua auai i solo tetee faasaga i le Peresetene.
O palota faata’ita’i foi sa faia i Peretania e faatatau i le faimalaga ane o Trump ua faailoa ai e 61 pasene o tagata Peretania e lē fiafia i le Peresetene o Amerika.
Mai lava i le taimi na taunuu ai Trump i le malae vaalele i Lonetona sa amata mai ai i’i solo tetee ma le faailoaina o finagalo o tagata lautele e ala i faailo ma pepa ua tusia ai o latou lagona e faatatau i le asiasi atu o Trump.
Fai mai pe ā ma le 5 afe tagata na savavali i le laumua o Peretania e faailoa le lē fiafia.
Ua faailoa mai e to’afā alii ua pu’eina e leoleo ona o faamatalaga sa latou faia i le taimi o ia tetee ma ua faailoa foi i le lipoti o le tele o polokalame faatino i le malaga atu a Trump ua mātele ina faia i nofoaga punipuni e lē maua ai se avanoa o tagata lautele ma ua malosi foi le puipuiga.
Puna o Faamatalaga: https://edition.cnn.com/2025/09/17/uk/trump-uk-state-visit-protests-intl
