I se lipoti i le asō i le leitio faavaomalo a Niu Sila ua faailoa ai e le IRP le vaega a le International Rugby Players lea e fai ma sui o tagata taaalo lakapi, e le’i auai le autaaalo i le tuufaatasiga o le model fou lea ua faalauiloa nei e le Lakapi a le Lalolagi poo le World Rugby e faagaioia ai le taamilosaga o le HSBC Sevens, lakapi ta’ito’afitu.
Fai mai le lipoti ua faailoa foi e se sooupu mai le World Rugby e lē moni lea faamatalaga mai le IRP ona sa faia faatalanoaga ma le autaaalo ma sui o le autaaalo e faatatau i le matāupu lea.
Fai mai le faamatalaga, na tuai ona tuuina atu ia i latou faamatalaga e faatatau i le faiga fou lea e ui o loo finau ane foi le World Rugby ua mae’a faailoa e le Ofisa Sfili o le IRP, Omar Hassanein i se pepa o ona faia faatalanoaga e faatatau i ia suiga ma sa amata mai lava i le 2024 ma faamae’a ia Mati o le tausaga nei ma ua mae’a foi ona ioeina ane e le Fono faatonu a le IRP.
Ua tula’i mai nei faaaliga finagalo i le mae’a ona faalauiloa o le faiga fou o le a faagasolo ai taamilosaga ta’ito’afitu a le World Rugby lea ua vaevaeina i vaega e tolu, peita’i o loo finau pea le faauluuluga o le IRP o tagata taaalo lakapi o i latou tonu ia e aupito sili ona malamalama i le taaloga ma sa tatau lava ona aofia ai i latou ia i le tuufaatasiga o lea faiga fou ua iai nei.
O loo ta’ua ai foi i lea lava lipoti le ‘au a Samoa lea ua lē agavaa mo le taamilosaga autū o le ta’ito’afitu e ui sa aofia i ‘au e fā pito i luga i le Challenger Series i LA lea na folafola ane ai ia faiga fou ae o loo ta’ua i le lipoti, ana faaaogā pea le format tuai sa iai lea e agavaa ai ‘au pito i luga e 12, lona uiga e mafai lava ona agavaa ai Samoa i le taamilosaga autū 2025/2026 peita’i la ona o le faiga fou ua iai nei ua lē agavaa ai i le taamilosaga autū faapea foi ma le vaega lua o le taamilosaga.
Puna o Faamatalaga: https://www.rnz.co.nz/international/pacific-news/561892/not-involved-world-rugby-accused-of-late-stage-player-involvement-in-sevens-overhaul
