E tolu atumotu o le Pasefika o loo aofia o latou tagata i poloa’iga a Trump ua faia e faatatau i atunuu e lē o ausia mea e mana’omia mo le aumau ai pea i Amerika.

O Tonga, Tuvalu ma Vanuatu lea ua ta’ua le aofia ai i le lisi o atunuu e 36 ua iloilo nei e Amerika le faia iai o sā i tulaga tau femalagaa’iga ma le aga’i atu i le malo tele.

O le amataga o le masina nei na sainia ai e Trump se poloa’iga na faasā ai sitiseni o atunuu e 12 mai le toe ulufale atu i Amerika.

E lē o maua ni faamatalaga mai atunuu ia e tolu o le Pasefika e tusa o lenei matāupu ae o le molimau a se tasi mai Tonga ua ta’ua ai i le RNZ, o le faimalaga o le tagata Tonga i Amerika e mana’omia ai le tele o tupe auā le faagaioia o le visa lea e mana’omia ai foi le malaga ane i le ofisa o Amerika i Fiti e talosaga ai.

Fai mai o le tusigaigoa tele a Amerika sa faia i le 2020 na faamauina ai e tusa ma le 78,871 tagata e iai o latou sootaga i Tonga, o loo aumau ai i Amerika.

Puna o Faamatalaga: https://www.rnz.co.nz/international/pacific-news/564249/three-pacific-nations-in-trump-s-expanded-travel-ban-list