O se sa’iliiliga fou mai le Lowy Institute ma lipotia i le RNZ ua faailoa ai o nisi o atunuu aupito matitiva o le lalolagi o le a o latou faia atu ni totogi o aitalafu tetele i le malo o Saina i le tausaga nei.

Fai mai lea sa’iliiliga poo le su’esu’ega foi, o Saina ua faatulaga e valaau mo le toe totogiina ane o le tusa ma le $22 piliona tupe Amerika o loo aitalafu ai atunuu e 75 e pei ona iloiloina e le Faletupe o le Lalolagi le World Bank i le tausaga nei 2025.

Fai mai la le lipoti e 10 atunuu o le Pasefika o loo aofia ai i lea lisi.

Ta’ua e lē na faatinoina le su’esu’ega mai le Lowy Institute, Riley Duke i le lipoti lava lea a le RNZ, ona o le tele o le aofai o nonōgatupe na faia e Saina i le vaitau o le 2010 ma le auala na faatulaga ai ia nonōgatupe i lalo o le faiga ua faaigoa o le Belt and Road Initiative, ua vaaia ai i le tausaga nei le tetele o repayments poo le toe totogiina atu o ia nonogatupe.

Na ia faailoa foi o tagata e tau fefefe i mea nei o aitalafu peita’i afai e faia se nonōgatupe e faatupe ai se poloketi e lelei mo le tupu o le tamaoaiga ma se atunuu foi o le Pasefika, o lona uiga o se nonōgatupe lelei lea ma o se aitalafu lelei foi e mafai ona toe totogi e ia lava lana aitalafu.

O Tonga, Samoa ma Vanuatu isi atunuu o le Pasefika o loo faamauina nonōgatupe sa faia mai ia Saina.

Puna o Faamatalaga: https://www.rnz.co.nz/international/pacific-news/563151/poor-countries-set-to-pay-22billion-for-china-debt