Ua saunoa le minisita o le va i fafo a Niu Sila, Winston Peters ma ua lipotia i le RNZ, o loo iai i le atunuu le aiā tatau e filifili ai poo ai e ulufale i o latou tuaoi, o lana tali lea i le fuafuaga ua feta’ua’ina mai a Trump ma lana faigāmalo o loo fuafua e faia ai sa tau femalagaa’iga, travel restrictions i atunuu o le lalolagi e aofia atu ai ma atunuu e tolu mai le Pasefika e pei ona faailoa atu muamua i talafou.
O Tonga, Tuvalu ma Vanuatu lea o loo aofia i le lisi o atunuu e pei ona fuafua iai Trump e faia iai sā ia.
Saunoa la Peters i le lipoti lea o popolega o Amerika e ono foliga mai e faatatau i le matāupu i sitiseni faatau poo faiga o loo maua ai sitiseni e tauala i inivesi lea foi o loo faatino i Vanuatu i le latou golden passport scheme.
O Tuvalu foi e pei ona saunoa Peters, o loo faatau tusifolau ma o i lea e ono tula’i ai popolega mo Amerika aemaise i le itu tau le puipuiga.
Peita’i i se finagalo faaalia o le sui ta’ita’i o le vaega faaupufai o le Leipa o loo ta’ua ai foi i le lipoti, ua saunoa ai Carmel Sepuloni e ao ona maua e le alii minisita se faamalamalamaga atoa o sā ia tau femalagaa’iga e pei ona fuafua e Amerika, ma i lona manatu e tatau ona finau atu aga’i ia Amerika ma lagolago ina ia aveese mai atunuu ia o le Pasefika ma lea lisi.
Puna o Faamatalaga: https://www.rnz.co.nz/international/pacific-news/564381/us-travel-ban-countries-have-the-right-to-decide-who-can-cross-their-borders-peters-says
