O le a saunia e Ausetalia taavale mo feoa’iga aemaise le lagolago i auaunaga tau puipuiga i upega tafa’ilagi mo le Atu Solomona lea o le a talimalo i le isi fonotaga a le Pacific Islands Forum.
Fai mai le Radio NZ o le minisita o matāupu tau le Pasefika a Ausetalia, Pat Conroy o le a ia faia le folafolaga lea i le laumua o le Atu Solomona o Honiara i le asō.
E lē gata i lea ua ta’ua o le a fesoasoani foi Ausetalia i le mata’itūina o i latou e faifaiva faasolitulafono i ogasami ia.
O loo iai i Honiara le alii minisita ma o le a faalauiloa ai foi ma le $20 miliona e tuuina atu mo lea fonotaga a ta’ita’i o le Pasefika.
Ua faailoa i le lipoti, o le amataga o le masina nei na foa’i ai e le amepasa o Saina i le Atu Solomona le $1 miliona tālā Amerika e faatau ai taavale e 27 e feavea’i ai ta’ita’i o le Pasefika pe a faataunuuina le Forum ae lautele atu la le foa’i a Ausetalia lea e $20 miliona e faatupe ai le lata i le 60 o taavale, fesoasoani i puipuiga tau initaneti ma le faaleleia o auala i le Atu Solomona.
Fai mai Conroy e mautū ta’utinoga a Ausetalia i le Atu Solomona ma le lautele o le Pasefika ma e malosi pe a tutūfaatasi.
Puna o Faamatalaga: https://www.rnz.co.nz/international/pacific-news/565219/australia-to-boost-cyber-security-and-provide-vehicles-for-solomon-islands-pacific-islands-forum
