Ua faailoa popolega o le faalapotopotoga o le Soifua Mālōlōina o le Lalolagi le WHO e faatatau i atunuu o loo lalata ane i PNG lea ua pepesi ai le vairusi o le polio.

Ua faamauina o lea vairusi e afua mai i le lē mamā o le fufuluina o lima, poo le taumafaina foi o taumafa ma vaiinu e lē o mamā ma e faigofie ona pepesi mai i isi tagata.

O le aai la o Lae i Papua Niu Kini lea o loo lipotia mai ai le pepesi o le polio i le Vaega 2 poo le Type 2.

Ua ta’ua foi e iai le popolega i le fanau laiti aemaise e le’i to’atele nisi ua faia tuipuipui.

O tamaiti i lalo o le 5 tausaga le matutua e faigofie ona aafia ma ua lapata’ia tagata ia matua’i faaeteete ma ‘alofia le aafia.

Ua faailoa e se sooupu mai le matāgaluega o le va i fafo a Ausetalia o loo latou fesoasoani atu nei ia Papua Niu Kini mo le puipuia o tagata mai lea vairusi, ma o le faia o tuipuipui o le a fesoasoani tele i le tuuitiitia o aafiaga o ia ituaiga vairusi i le soifua o tagata.

Puna o Faamatalaga: https://www.rnz.co.nz/international/pacific-news/561209/polio-outbreak-confirmed-in-papua-new-guinea-world-health-organisation-says