O se palota tulaga ese le faigā filifiliga a Samoa i le masina fou o Aokuso, ona e leai se itumalo o toe faapea o le a lē palotaina lo latou tofi faipule faaolioli i le toe faaauau o le tofi sa iai i le paea’iga lona 17 a le Palemene ua faatā’ape.
E tapunia le lesitala o sui faatutū i le ta o le 12 o le aoauli o le Aso Toonai na te’a nei, ma faailoa lautele e le Komesina suafa o sui faatutū ua mae’a ona lesitala, na faamautū ai o itumalo faapalota uma e 51 o le a toe sa’ili o latou sui usufono o le Palemene i le faigāpalota tele o loo loma nei.
O le palota tele o le 2021 e tolu itumalo e le’i palotaina o latou tofi, o Lotofaga, Lepa, ma Faleata 3.
O le lisi ua faailoa lautele e le Komesina o faigāpalota ua manino mai ai e 192 matai lesitala o itumalo o le a faia iai le filifiliga mo nofoa e 51 o le paea’iga fou lona 18 a le Palemene.
Ua iloa foi i le lisi o sui faatutū mo nofoa o itumalo palota e 51, o sui usufono sa sē’ei i tofi faipule o itumalo palota o Alataua i Sisifo, o Falealupo, ma Gagaifomauga 1, ua lē o toe tauva i nofoa o ia itumalo i le motu tele i Salafai.
Ua mautū foi i sui ua lesitala e avea ma sui faatutū, e to’alua sui o le a tauva ma le Palemia o le malo tausi o le ta’ita’i o le vaega faaupufai fou o le Samoa ua Potopoto mo le nofoa o le itumalo o Lotofaga, to’atasi o le a tauva mai ma le ta’ita’i o le vaega faaupufai e puipuia aiā tatau o tagata mo le nofoa o le itumalo o Lepa, to’atasi foi o le a tauva mai ma le ta’ita’i o le vaega faaupufai o le Faatuatua i le Atua Samoa ua Tasi mo le nofoa o le itumalo o Gagaifomauga 3.
O lea foi ua manino i le faailoa lautele o sui faatutū ua mae’a ona lesitala, o itumalo o Palauli 2 ma Gagaifomauga 2 i le motu tele i Salafai o loo pito to’atele le numela o sui faatutū e to’aono.
O isi itumalo e to’alima, to’afā, to’atolu ma le to’alua.
E 23 sui tauva tama’ita’i.
O le faigāpalota tele ia Aperila o le tausaga e 2021 e 200 sui faatutū sa tausinio ai, lea sa pito to’atele sui sa tauva i le fu’a a le vaega faaupufai e puipuia aiā tatau a tagata e 114, ae o le Faatuatua i le Atua Samoa ua Tasi e 50.
E sefulufā sa tauva mo le pati o le Tautua Samoa ae ono sui tauva o le pati o le Samoa First ae to’atasi sa tauva i le pati o le Sovereign Independent Samoa Party.
O le a faamautū le numela o sui tauva e tausinio i le faigā filifiliga aoao a le atunuu i le masina fou pe a mae’a tagofia e le faamasinoga o faigāpalota pe fia ni talosaga o le a faaulu atu e fesiligia ai le tulaga agavaa o le 192 o sui ua lesitala e avea ma sui tauva.
