O le usuia ai o le fonotele i Malua i lenei vaiaso na amata ai i le saa o se sui ta’ita’ifono e sui tulaga i le susuga i le faifeau tausinuu susuga Auatama Esera o le a mālōlō penisione lea sa filifilia i lea tofiga i le fonotele o le tausaga na te’a nei, ae o le tausaga e 2023 na filifilia ai e le fonotele o lena tausaga e avea ma ta’ita’ifono ina ua tuumalo le susuga i le faifeau toeaina sa sē’ei i le tofiga, le susuga Iosefa Atapana Uilelea.

O loo galulue le susuga Auatama ma le faletua o Tamara Esera i le auotu EFKS i Sapapalii Savaii. 

I le filifiliga o se sui ta’ita’ifono ua tusiaao nei iai le usugafono e ala i le palota e avea le faifeau toeaina le susuga Enefatu Lesā o loo galulue ma lona faletua o Seira i le aulotu EFKS i Tanoalei’a i Vaivase Uta.

Ua faailoa mai e se molimau o le palotaina o se sui ta’ita’ifono i le Aso Gafua e to’asefulutasi faafeagaiga sa faatutū e faia iai le filifiliga ae na manumālō ai le susuga Enefatu ua avea nei ma sui ta’ita’ifono mo le na o le fā o aso, ona see atu lea e tauave le tofiga ta’ita’ifono aoao o le ekalesia pe a mae’a le fonotele o loo faagasolo nei.

O le Aso Faraile o le vaiaso nei e toe faia ai le filifiliga a le fonotele e sa’ili ai se sui ta’ita’ifono.

I le fonotele lava i Malua e to’asefuluono faifeau ua faauu ma ua maua o latou tusi faifeau Samoa poo le FS, o le a mafai ai ona galulue ma faatino nisi o sauniga tāua e pei o faamanatuga.

O nisi o loo galulue i le tausiga o aulotu a o nisi o loo galulue mo le ekalesia.

O nisi foi o faifeau ua maua FS ua talia valaau e osifeagaiga ai ma aulotu.