Ua oo mai nei faamaumauga ua faailoa ai tulaga o le pa’ū maualalo ai o le pasene o le fanau a’oga o loo feagai ma faafitauli o le tusitusi ma le faitautusi.
E pei ona faamauina e na o le 24% o fanau o le Vasega 8 o loo ausia maka faatulagaina o su’ega ma le 61% ua silia ma le tausaga le mamao i tua ua tuai ai a’oa’oga ma le malamalamaga o le tamaitiiti.
I vasega laiti, e pei o le Vasega 3 e 41% o fanau na ausia maka aloa’ia, ma le Vasega 6 e 33% ae o le tulaga ua iai o le taimi e amata aga’i ai fanau i luga o iinā e vaaia ai le pa’ū tele o pasene.
I le oo mai ai o faamaumauga, o lea ua faalauiloa mai e le tamaitai Minisita o A’oga, Erica Standford, o le tatala aloa’ia ai o se ta’iala fou ua faaigoaina o le “Make it Write” action plan.
Ta’ua o loo aofia ai ni metotia mo le tusitusi o le Writing Acceleration Tool mo le 120,000 o fanau a’oga o Vasega 6–8, e amata atu i le tausaga fou.
O le a iai foi fesoasoani tupe e faamatuu atu lea i a’oga maualuluga e faatautaia ai ni fonotaga faalea’oa’oga mo le tusitusi ma le faitautusi.
Ma le tuufaatasia ai o ni tusi faasino ala mo fanau a’oga mai vasega laiti se’ia oo i le Vasega 8.
Faaopoopo Standford, e lē gata ina faia mo le Gagana Peretania ae mo le Gagana Maori.
Ma ia ta’ua le tāua tele o le iloa e le tamaitiiti ona tusitusi.
Puna o Faamatalaga: https://www.nzherald.co.nz/nz/politics/education-minister-erica-stanford-makes-announcement-on-student-achievement/VMIVPPVYAZHXFLE7SVVC5LUZVQ/?lid=re0a1ib70cve
