Ua faailoa faalaua’itele nei e le Komesina o faigāpalota le afioga Toleafoa Tuiafelolo Alexander John Stanley, le piliota o faatosina a sui tauva ma vaega faaupufai lea e amata i le aso 14 o Iulai ae mae’a i le aso 24 o Aokuso, a o lumana’i le faigāpalota tele i le aso 29 o Aokuso lava.
E ono vaiaso o le a faatino ai faatosina ae ua fautuaina sui tauva ma vaega faaupufai e lē toe faatagaina ni faalauiloa o ia faatosina pe a tapunia.
Ua aumai ai foi ma le faamanatu a le Komesina o faigāpalota ma lona ofisa i sui faatutū ma vaega faaupufai o se solitulafono le faia o ni faatosina ma ni faalauiloa a o le’i tapunia le piliota e faaulu ma lesitala ai sui tauva lea e amata i le Aso Gafua 7 o Iulai ae tapunia i le Aso Toonai 12 o Iulai i le ta o le 12 i le aoauli.
