“O totogi faaopopo ua leva ona iai, ma na amata mai lava i le faigamalo talu ai lea sa iai le totogi faaopoopo o le tului i le vaitau o le misela, e lē o se faiga fou, ma o faiga lava na sau ai i tausaga ua tuanai.”
O le saunoaga lea a Lautimuia Afoa Uelese Vaai, o le Minisita o Tupe ina ua fesiligia e tusa ai o le $15 o loo manatu tagata faisaofaga sa lē tatau ona iai le tupe e toese mai ia latou pasene.
Na faailoa e Lautimuia o le tupe lea ua ta’ua o le administration fee ma e lē fou.
E 24.07 miliona tala le aofaiga atoa o le tupe e faaalu i le tului le tumau faameaalofa a le NPF.
O le toatele o sui faisaofaga a le faalapotopotoga o faaputugatupe mo le lumanai manuia o samoa le NPF, ua tala i tua a latou vaega o le 2.4 pasene o le tupe tului faameaalofa a le faalapotopotoga mo ana tagata faisaofaga.
Na saunoa le minisita, o le 70 pasene o le aufaisaofaga ua mae’a ona faamatuu atu a latou tului mo le tului faameaalofa a le faalapotopotoga.
Ae na ia ta’ua foi e iai nisi o le a lē talaina i tua a latou tului faameaalofa ae o le a faaopoopo i luga o a latou saofaga.
I le feiloaiga a le autusitala ma le minisita ma le taitaifono talu ai nei, na ia faaalia ai o le a mātau pea ma le toto’a e le Komiti le faagasologa o tupe maua a le NPF ma o le a fua foi i ai pe afai e solosolo lelei se isi tului faameaalofa.
O le masina o Aperila o le a faamuta ai le toe faamatuu mai o lea tului mo le aufaisaofaga.
