O manu’aga tugā i le ulu, o le lima, ma le tino atoa, le mafua’aga o le maliu o le tamaitaʻi o Dr Caroline Sinavaiana Gabbard.

O le molimau lea na fofoga iai le Faamasinoga Maualuga a le alii foma’i ia Dr James Kalougivaki i le taeao analeila na tuusaʻo mai i auala o fesoota’iga faaonaponei mai Fiti.

O le alii foma’i e tusa ma le 3000 matāupu faapenei ua ia faatautaia i le galuega lenei i Fiti ma le Pasefika ma ia molimau ai.

Sa a’oa’oina i le Iunivesite i Fiti i le Master in Pathology.

O ia o se sui o le Fiji Medical Council faapea le Pasefika ma le Atu Asia e aofia ai ma Samoa.

Sa faailoa e le alii foma’i o ia e faauluulu iai le Forensic Pathology i le Ofisa o Leoleo i Fiti, ma e tele manu’a eseese mai le ulu o lē ua maliu e aofia ai ni taʻe se lua i le ulu i le pito i tua e tusa ma le 20 – 22mm le loloto o ia taʻe e fesoota’i i se laina (laulua) i le ipu o le ulu.

O lima e lua o lē ua maliu e gaui ponaivi, o lona lima agavale ua suia mai le tulaga sa iai.

O manu’a i le tino e mai se mea ma’ai faapea ma le paʻu o le ulu.

O ia manu’a o loo atagia ai e pei e foliga mai sa taumafai lē ua maliu e puipui mai ia mai se faaoogalima.

O manu’a i le atigipoo o loo vaaia ai e pei e foliga i se mea ma’ai lapotopoto e faapei o le ulu o se samala.

O isi manu’aga e pei o le sao o le toto i le fai’ai e le’i mafai ona iloa ona o le tulaga ua iai le tino maliu ona o le umi mai le taimi na tupu ai le faalavelave ua lē iloa lelei ai isi manu’aga.

E ui i ia manu’a tugā i le ulu peitai na faailoa e le alii foma’i e le’i avea lea ma tulaga na afaina ai le fai’ai o lē ua maliu.

O le molimau a le alii foma’i, talu ai ona o le loloto o manu’a i lona ulu, ma o le tugā o ia manu’aga ua afua ai le maliu o Dr Caroline Gabbard.

Sa fesiligia e le tama’ita’i loia o loo tula’i mo Papalii Sia Figiel ia Unasa Iuni Sapolu le tulaga o le leai o se aafiaga i le fai’ai poo le ā tonu le loloto o se manu’a i le atigipoo ae e lē o aafia le fai’ai.

Na faaalia e le alii foma’i o manu’aga tugā ia ua afua ai le taʻe i le ulu ae i le tulaga o se toto e sao atu i le fai’ai ua lē o maua lea ona ua aofia faatasi ma le faaleagaina o le tino ua iai (decomposition).