O manu’aga tuga i le ulu o le lima ma le tino atoa le mafuaaga o le maliu o le tamaitaʻi o Dr Caroline Sinaivaiana Gabbard.
O le molimau lea na fofoga iai le Faamasinoga Maualuga a le alii fomai ia Dr James Kalougivaki i le taeao analeila tuusaʻo mai auala o fesoitaiga faaonaponei mai Fiti.
O le alii fomai ua tusa nei ma le 3000 mataupu o ia faatautaia i le galuega lenei i Fiti ma le Pasefika ma ia molimau ai.
Sa aoaoina i le Iunivesite i Fiti i le Masters in Pathology. O ia o se sui o le Fiji Medical Council faapea le Pasefika ma le atu Asia e aofia ai ma Samoa.
Sa faailoa e le alii fomai o ia e faauluulu iai le Forensic Pathology i le Ofisa o Leoleo i Fiti e tele manua eseese mai le ulu o le ua maliu e aofia ai ni taʻe se lua i le ulu i le pito i tua e tusa ma le 20 – 22 mm le loloto o ia taʻe e fesootai i se laina (laulua) i le ipu o le ulu.
O lima e lua o le ua maliu e gaui ponaivi, o lona lima agavale ua suia mai le tulaga sa iai. O manua i le tino e mai se mea maai faapea ma le paʻu o le ulu.
O ia manua o loo atagia ai pei e foliga mai sa taumafai le ua maliu e puipui mai ia mai se faaoogalima.
O manua i le atigipoo o loo vaaia ai pei e foliga i se mea maai lapotopoto e faapei o le ulu o se samala.
O isi manuaga e pei o le sao o le toto i le faiai e lei mafai ona iloa ona o le tulaga ua iai le tino maliu ona o le umi mai le taimi na tupu ai le faalavelave ua le iloa lelei ai isi manuaga.
E ui i ia manua tuga i le ulu peitai na faailoa e le alii fomai e lei avea lea ma tulaga na afaia ai le faiai o le ua maliu.
O le molimau a le alii fomai talu ai ona o le loloto o manua i lona ulu…ma o le tugā o ia manua ua afua ai le maliu o Dr Caroline Gabbard.
Sa fesiligia e le tamaitai loia o tulai mo Papalii Sia Figiel ia Unasa Iuni Sapolu le tulaga o le leai o se aafiaga i le faiai poo le a tonu le loloto o se manua i le atigipoo ae e le o aafia le faiai
Na faaalia e le alii fomai o manuaga tugā ia ua afua ai taʻe i le ulu ae i le tulaga o se toto e sao atu i le faiai ua le o maua lea ona ua aofia faatasi ma le faaleagaina o le tino ua iai. (decomposition)
