O le tama’ita’i na maliu a o iai i le vaavaaiga a leoleo, ua ta’ua i lipoti sa fana e leoleo i le taser i ni nai itula muamua atu a o le’i maliu, talu ai sa ia faia ni gaioiga e afaina ai lona ola ma sa ia faamata’uina foi le afaina ai o isi.
O se faamatalaga mai le Commander Superintendent a le itumalo o Canterbury, susuga Tony Hill, na ia ta’ua ai, na oo ane lipoti i leoleo pe tusa o le 1am i le vaveao o le Aso Toonai i se vevesi o loo tupu i se fale i Rakaia, o se tama’ita’i o loo faasuā’avā ma o loo ia te ia se naifi o loo amata ona ia faamanu’aina ai lona tino ma ia faamata’u foi ona faaaogāina o lenei naifi i isi.
Sa taumafai e leoleo aga’i i lenei tama’ita’i ina ia tuu ese le ‘au’upega o loo ia uuina ae sa le’i mafai, o lea na faaaogā ai loa le taser e fana ai.
Na mafai ai loa ona pu’e e leoleo ma avatu e taofia i le latou nofoaga o leoleo i Kalaiesetete, ma o le te’a laititi o le 4am i le vaveao o le Aso Sa, na siaki ai e se foma’i lenei tama’ita’i a o le’i avatu i lona sela e taofia ai.
Ae pe tusa o le 6.50am i le taeao lava lea o le Aso Sa, na maua atu ai le tama’ita’i lenei i lona sela ua iai i se tulaga faalētonu, ma valaau ai loa e leoleo le auaunaga a le St John ma oo atu e taumafai e toe lavea’i le ola o lenei tama’ita’i peita’i e le’i manuia.
Puna o Faamatalaga: https://www.rnz.co.nz/news/national/571227/woman-who-died-in-police-custody-in-christchurch-was-tasered-before-her-death?cid=newsletter
