I le 44 o sui faatutū faaolioli ua lesitala e tauva faatuto’atasi, o le tofa Tiatia Faleupolu Tevita ua 72 tausaga o le soifua, o se tasi o lea 44, lea o le a finau mai i le nofoa o le itumalo faapalota o Palauli 2 poo Palauli le Falefa.
O se tamalii sa tautua i le malo mo le lata i le 40 tausaga i le matāgaluega o faato’aga ma faigāfaiva, ae silia i le sefulu tausaga o tautua ma auauna i le atunuu i le tofi faamasino o le Faamasinoga o Fanua ma Suafa, lea sa oo lava i le tulaga o le Peresetene lagolago se’ia oo ina mālōlō manumālō i le aulia o tausaga o le soifua e tuua ai lea tofiga.
O Palauli 2 le isi itumalo i Savaii e to’aono sui faaolioli ua lesitala e tauva ai, ma o loo aofia ai sui o nisi o pati faaupufai faatasi ai ma Tiatia Faleupolu Tevita.
E galue Tiatia o se faamasino o le Faamasinoga o Fanua ma Suafa o malomaloā finauga o manatu ma finagalo e lē gata o ta’ita’i o upufai o le malo ae o le sosaiete a loia, o le faamasinoga ma le lautele o le atunuu i tulafono taufaaofi e tolu na pasia ai teuteuga o le faavae o le tausaga 2020 ma suia ai le taotoga o le pulega o galuega a le faamasinoga.
Se talanoaga ma le tofa Tiatia Faleupolu Tevita o se tamalii o loo tapena e tauva i le palota tele mo le tofi faaolioli o le itumalo faapalota o Palauli 2, lea sa tula’i mai ai i le tofi faipule le afioga Leota Laki Lamositele Sio.
