E 6 masina ua faasala ai i le falepuipui se alii Fiti e faamautū i Amerika Samoa, ina ua faamaonia e le Faamasinoga Maualuga a Samoa, lona ioeina o le moliaga o lona umia ma le faaulufale mai i lo tatou atunuu o le pauta faasaina le nakoti o le aisa, e tusa lona mamafa male 0 tesimale 9 kalama (0.9 grams).
O Rupeni Luvu e galue i le ofisa o le taaloga soka i Amerika Samoa ae na taunuu i le malaevaalele le Regional Airport i Faleolo i le aso 20 o Mati o le tausaga nei, i le faamoemoe e pu’e ai le isi ana vaalele e malaga ai i Niu Sila.
Peita’i o le siakiina o lana atopa’u i le masini fā’ata i le malaevaalele i Faleolo na maua ai se tagapepa iila laititi o loo fafao ai le aisa, faapea ma se paipa e ula ai sa maua ai foi i le ato.
Sa iai finauga a le loia sa tula’i mo Rupeni mo se faasalaga tupe ae lē o le falepuipui, e fua i isi foi faasalaga o le umia o le aisa sa faasala tupe.
O le tasi o ia faasala tupe e luaafe tālā na faia i se tamaitai Filipaina na malaga mai foi i Amerika Samoa afea ai le malaevaalele i Faleolo ae maua ai foi o ia aumai le aisa e tusa le mamafa ma le 0 tesimale 89 kalama (0.89 grams).
Peita’i o le silasila a le faamasino le afioga Leiataualesa Darrel Clarke o le faasalaga lava ia o le solitulafono o le umia o le nakoti lo le aisa lea ua faavasega i le A, poo le class A type narcotics e pei o le aisa, o lona faasalaga lava o le falepuipui pe a faamaonia.
O le ono masina ua nofosala ai Rupeni Luvu 55 tausaga le matua, ua toesea ai aso sa nofo taofia ai i le vaaiga a leoleo a o faagasolo su’esu’ega i lana solitulafono.
