O ni alii talavou se to’alua sa molia i solitulafono o le faaoo manu’a tugā na māfua ai ona fano le soifua o se isi taule’ale’a o le nuu o Satitoa, o le isi na faasala i le 9 masina i le falepuipui i se faai’uga a le Faamasinoga Maualuga na muamua fofogaina, a o le isi ua faasala i le 19 masina i le faasalaga na fofogaina i le masina o Me o le tausaga nei ae faato’ā faailoa lautele i le upega tafa’ilagi o loo maua ai faai’uga o faamasinoga a atunuu o le Pasefika.
O le eseesega o masina o ia faasalaga i le falepuipui ua māua i su’esu’ega a le Faamasinoga Maualuga e iai le sasi ma o le faasalaga sa tatau ona tuli o Toatasi Uili e 15 masina ae na o le iva masina o loo tuli.
O Anetone Lanouta poo Lanotai Lanouta e 19 masina.
O lē na maliu i le faaoo manu’a tugā, o Peter Feiloaiga e 32 tausaga le matua o Satitoa.
O le ogaoga o manu’a i lona ulu na māfua ai ona maliu.
Na māfua le solitulafono e pei ona faailoa i le faai’uga ona o lē na maliu sa faaoolima i le tuafafine o i la’ua ua nofosala i le falepuipui.
