Ua mae’a ona iloilo e le Faamasinoga Maualuga i luma o faamasino e to’atolu e aofia ai le Faamasino Sili, le talosaga na faaulu e le Loia Sili e avea ai ma sui o le Komesina o faigāpalota ua finauina ai se 6 vaiaso poo le tasi le masina ma vaiaso e lua e faaopoopo i le 3 masina o loo aiaia faaletulafono e tapena ai le palota tele o loo loma nei a le atunuu.
O se talosaga sa folasia ai e le Komesina o faigāpalota le afioga Toleafoa Tuiafelolo Alexander John Stanley ina ua tula’i e fai lana molimau i mafua’aga o le talosagaina o le faamasinoga mo ni faatonuga poo orders e faatonutonu ai le tulafono faavae e faasino i le 3 masina o loo aiaia, pe talafeagai ona faamatuu le taimi faaopoopo ua talosagaina.
E lē gata ina sa folasia e le Komesina o faigāpalota mafua’aga ae faapea foi i le finauga a le Loia Sili ma ia faailoa aiaiga o tulafono o loo mafai ai i le pule faataga a le faamasinoga ona faia se faai’uga.
Peitai o loo finau loia mo nisi o pati faaupufai e pei o le vaega e puipuia aiātatau a tagata, o le pati o le SNDP, le Faatuatua i le Atua Samoa ua Tasi ma le pati faaupufai o le Democratic Republic, e tatau lava ona usita’ia le aiaiga e 3 masina o loo i le Vaega 64 o le faavae.
O le loia mo le pati faaupufai fou o le Samoa ua Potopoto le Samoa Uniting Party sa fesiligia le Komesina o palota pe lava le 3 masina mo ana tapenaga o meafaigaluega e pei o masini computers ma pusa palota, lea sa tali le komesina e mana’omia se taimi faaopoopo ona o le auala e faatino ai tauofoga a le malo i le sa’ilia o se kamupani e aumai tasi ai ia mea faigaluega aemaise o le aumai mai fafo.
E tusa ma le 400 masini computers o le ituaiga o laptops o loo mana’omia.
O pusa palota o loo iai le fuafuaga e aumai mai Niu Sila ona o pusa palota sa fausia i laupapa plywood mo le palota o le 2021 ua faaalia e le komesina ua faaletonu.
O le aotelega o lenei matāupu na māfua ai ona sa’ili e le Komesina o faigāpalota se taimi faaopoopo e tapena ai lona ofisa i le palota tele ona ua faafuase’i ona faamuta le paeaiga faapalemene 5 tausaga a o le’i oo ia Aperila o le tausaga fou e faatino ai le isi faigāfilifiliga a le atunuu e ala i le faigāpalota.
O se taimi muamua foi lenei talu mai le ulua’i paeaiga faapalemene a le malo tuto’atasi o Samoa ua faatā’ape faafuase’i ai le Palemene a o le’i mae’a le taimi faatulagaina o le paeaiga.
Ua faailoa e le Komesina o faigāpalota i iloiloga a le faamasinoga o lana talosaga, o le taimi nei ua ausia le 55 pasene o tagata agavaa e palota ua lesitala.
O le aofa’iga o tagata palota ua mae’a lesitala mai lea 55 pasene e 64,390 e fua i le aofa’iga atoa o tagata e agavaa ona palota e tatau ona lesitala e 117,225.
O le palota tele o le 2021 e 128 afe 822 le aofa’iga o le lola o tagata palota ae e na o le 89 afe tagata na palota.
O le aso 4 o Aperila o le tausaga na te’a nei na amata ona toe lesitala uma ai tagata palota i lola a itumalo faapalota e 51 ma o loo faaauau pea lea galuega i le taimi nei.
I le 117,225 o tagata e tatau ona lesitala mo le palota o loma nei, e leai se aiaiga faaletulafono o aiaia ai se numela o tagata palota e tatau ona lesitala e faatino ai se faigāpalota.
O le aoauli o le Aso Tofi o lenei vaiaso o le a aumai ai se faai’uga a le Faamasinoga Maualuga i le talosaga a le Komesina o le ofisa o le komisi o faigāpalota.
