Ua lamalama faai’u le faamanatuina o le Vaiaso o le Gagana Samoa i totonu o Niu Sila ma ua faailogaina foi e le to’atele mai isi vaega o le lalolagi.
O le tausaga nei ma lona autū, ‘Ia malu lou sa, Folau i lagimā.
Faaāta manino e le komiti, le vaiaso o le gagana Samoa i se vaa e folau a ua mae’a tapena lelei ma saunia mo ni faigatā e ono feagai i le faigāmalaga.
O se vaiaso e faailoga i tausaga ta’itasi ma e oo mai i le tausaga nei ua maitauina le eseese o taga ma gaioiga ua faatino e tagata Samoa e faamanatu ai ma faatāua lea vaiaso faapitoa.
I luga o le social media ua vaaia le taumafai o nisi iloga i taaloga, faafiafiaga aemaise a’oa’oga, e faaleo ni upu Samoa e ta’ua ma faaaogā i aso ta’itasi e faamanatu ai le tāua o le gagana e lē gata i Samoa, Niu Sila ae soo se vaega lava o le lalolagi.
O nisi a’oga aemaise i Niu Sila nei sa faatino ai le gasesega o taumafa Samoa aemaise le ave o le faatāua i le tautala i le gagana Samoa mo le vaiaso atoa.
O se tasi foi tamalii Samoa ua loa foi i le auaunaga tau faia’oga aemaise le gagana, Tauanuu Perenise Tapu Sitagata na faalauiloa lana tusi mo tamaiti i le gagana Samoa faapea le faaperetania, tusi ua faaigoa “Alagaupu Faasamoa ma uiga mo tamaiti”.
Puna o Faamatalaga: https://www.rnz.co.nz/international/programmes/datelinepacific/audio/2018989884/gagana-samoa-celebrations-kick-off-in-aotearoa
