O loo iloilo nei e le Komesina o Auaunaga Lautele, Public Service se toe fetuuna’iga o nisi o ofisa o le malo e aofia ai le Matāgaluega o Tinā ma le Matāgaluega o Tagata Pasefika.
Fai mai le RNZ o Sir Brian Roche o loo feagai ma lea matāfaioi ma ua feta’ua’ina foi le ono iai o fetuuna’iga e tuufaatasi atu ai isi ofisa laiti i matāgaluega tetele.
Faailoa e le RNZ sa talosagaina se faamatalaga mai le ofisa o le Palemia e tusa o lea matāupu ma suiga e ono faatino peita’i sa toe tuuina atu le latou talosaga aga’i i le Komesina lea o auaunaga lautele ma ua faamaonia ane ai e Roche o loo ia vaavaai i gaioiga ma auaunaga faatino a matāgaluega aemaise o le faamalosi’au i auaunaga ma aafiaga o a latou matāfaioi.
Saunoa le ta’ita’i o le patī a le ACT, David Seymour i le lipoti lea o ni suiga e faia i matāgaluega o le mea lea e faatino e le minisita ma le komesina o auaunaga lautele ma e lē faate’ia o ia pe a faia se suiga i se tasi o matāgaluega ua leva ona fesiligia e lana vaega faaupufai pe aisea e mana’omia ai ona faia sea matāgaluega mo ituaiga tagata ae o isi auaunaga uma a le malo e tatau ona kilivaina mo tagata uma.
Ua faailoa i le lipoti e lē o fia faailoa ni finagalo o nisi minisita o le Kapeneta i lea matāupu.
Puna o Faamatalaga: https://www.rnz.co.nz/news/political/571152/commissioner-won-t-rule-out-absorbing-ministries-for-women-pacific-peoples-into-larger-organisations
