O loo sa’ilia nei e le totino ua faaigoa o le Retail NZ se fonotaga ma le Minisita o Leoleo ina ua faailoa i lipoti a le leitio faavaomalo a Niu Sila se faatonuga ua faia i le aufaigaluega a leoleo, o le a lē toe su’esu’eina ni tuua’iga e faatatau i ni gaoiga e i lalo ifo o le $500 tala Niu Sila.
Fai mai lipoti o Mati na tuuina ai lea faatonuga i le aufaigaluega ma afua ai nisi o tulaga ua lē malamalama ai isi.
Fai mai le pule o le Retail NZ, Ann Marie Johnson i le RNZ o loo sa’ili vave nei sa latou fonotaga ma le Minisita o Leoleo e faatalanoa ai le matāupu.
O loo faaauau pea ona una’ia e le Retail NZ tagata ina ia faaauau pea ona lipoti faalavelave uma i leoleo e tusa poo le tele poo le itiiti o se soligatulafono.
Fai mai a latou o aso uma e feagai ai le aufaipisinisi ma faiga faamata’u ma sauā a tagata e osofa’ia faleoloa ma gaoia meatotino ma e iai foi le aafiaga tau le soifua mālōlōina e afua mai i nei uiga aemaise o le saogalemu o le aufaigaluega i faleoloa, ma e tatau ona talanoaina lenei matāupu ma leoleo.
Puna o Faamatalaga: https://www.rnz.co.nz/news/national/562165/retail-nz-wants-urgent-meeting-with-police-minister-over-police-shoplifting-change
