Ua finau malosi ane nisi o kulupu e tula’i mo tagata malaga atu i Niu Sila, migrants, i le lē fetaui o suiga ua feta’ua’ina nei a Niu Sila e faatatau i le tipoti ese o tagata mai le atunuu.
Fai mai ia kulupu ma lipotia e le RNZ, o ia faiga ua tuu ai tagata Pasefika i se tulaga lamatia ma o ni faiga lē sa’o.
O loo ta’ua i le lipoti o suiga o loo feta’uaina i le Tulafono o Femalagaaiga, Immigration Act pei ona folafola mai i le aso 4 o le masina nei, o le a faafaigofie ai ona tipoti e se tagata e lē o ni sitiseni ma ua solia ni tulafono e ui ua leva foi ona aumau i Niu Sila.
Lona uiga e tusa pe ua silia ma le 20 tausaga talu ona aumau i Niu Sila ae solitulafono ogaoga e mafai lava ona tipoti ese i lalo o suiga fou ua fuafua.
O le finau la a kulupu ia e tetee i ia suiga ua ta’ua ai o upu ma saunoaga na faia e le Palemia Christopher Luxon i le fonotaga a atunuu o le Pasefika i le Atu Solomona ua matua’i le ogatasi ma gaioiga a lana faigāmalo o loo fai nei i tagata Pasefika i Niu Sila.
Ua faailoa foi i le lipoti le i’uga o se su’esu’ega na faia e le ofisa o Malo Aufaatasi i le tausaga na te’ nei, na faamauina ai o faiga faavae nei a Niu Sila o le toe tipoti o tagata Pasefika i o latou atunuu o loo tuua’ia foi o se tasi lea mafua’aga o le faatupula’ia o soligatulafono i le Pasefika.
Soligatulafono ua oo ai ina iai se sao i le matāupu e faatatau i fualaau faasāina, le soifua māloloinaōma isi mataupu tau le soifuaga e tulai mai i totonu o atumotu e pei o Samoa, Tonga ma Fiti.
Puna o Faamatalaga: https://www.rnz.co.nz/international/pacific-news/573811/overstayers-not-a-problem-migrant-advocates-criticise-govt-s-proposed-deportation-laws
