Ua taofia mo le taimi nei e Niu Sila le lata i le $20 miliona o le faaputugatupe autū mo le Atu Kuki ina ua faailoa e le faigāmalo a le Atu Kuki ua mae’a sainia ni maliega faapaaga ma Saina i le amataga o le tausaga nei e aunoa ma le logoina o Niu Sila.
O le RNZ o loo faailoa ai lea lipoti ma ua logoina ai e le Minisita o le Va i Fafo a Niu Sila o Winston Peters le faigāmalo a le Atu Kuki i le faai’uga ua faia ma o le asō ua faailoa ai faalaua’itele.
O loo iai nei i Saina le Palemia o Niu Sila i lana ulua’i malaga asiasi aloa’ia i lea atunuu ma o loo iai le fuafuaga e faia sa la feiloa’iga ma le ta’ita’i o Saina.
O le Atu Kuki e iai le faamalumaluga a Niu Sila e pei ona faailoa i le lipoti ae pulea lava e latou a latou matāupu ae fesoasoani iai Niu Sila i matāupu tau le va i fafo aemaise le puipuiga ma fesoasoani mo faalavelave faalenatura.
O le maliega na sainia e atunuu e lua i le 2001 e mana’omia ai ona felogona’i i matāupu tau le puipuiga ma le saogalemu ma o i la lea ua faailoa e Peters ua lē tausisia e le Atu Kuki.
O tagata o le Atu Kuki e umia tusifolau Niu Sila e agavaa ai foi ona faigaluega ma aumau i Niu Sila ma i le taimi e le’i mamao atu sa faaāta ane ai e le Atu Kuki le faia o le latou lava tusifolau ae na toe faaui i tua lea finagalo ina ua lapata’i atu Niu Sila o lea fuafuaga o le a faamata’u ai i sootaga tau le faavae o atunuu e lua.
O loo matua’i popole le Itu Agai a le Atu Kuki i le taofi atu e Niu Sila o lea faaputugatupe ma ua tatau ona iai se faamalamalaga o le matāupu mai le Palemia o le atunuu, Mark Brown.
Puna o Faamatalaga: https://www.rnz.co.nz/international/pacific-news/564618/explainer-why-has-new-zealand-paused-funding-to-the-cook-islands-over-china-deal
