O le Peresetene o le faigamalo a Niu Kaletonia o Alcide Ponga na ia saunoa e lē taliaina le aiā fua o isi ta’ita’i o le Pasefika ia latou matāupu faapolokiki faalotoifale.
O lana faamatalaga na faia i le RNZ Pacific i le faamanatuina o le atoa o le tausaga talu ona mae’a vesiga i totonu o le atunuu ma ua faamanatu ai e Ponga o le matāupu e aofia ai lona atunuu o se matāupu i le va ma Farani.
Na ia faamamafa le tāua o le faatumauina pea o le sootaga a Niu Kaletonia ma le itulagi o loo iai aemaise lava i matāupu tau le tamaoaiga, aganuu ma polokiki foi ae aua le upuia fua mea o loo tutupu i lona atunuu i le va ma Farani ona o le faafitauli lava lea a latou ae lē o le Pasefika atoa.
Na ia faamanino foi e faatolu ona palota tagata Niu Kaletonia ma faamautū ai lo latou manana’o pea ia Farani ma o faiga faatemokalasi e tatau lava ona faaaloalogia le filifiliga a tagata.
O isi ta’ita’i o le Pasefika o loo lipotia le faailoa o finagalo i le matāupu lea a Niu Kaletonia e aofia ai lē sa avea ma Palemia o Vanuatu, faipule mai Tuvalu, Palemia o Fiti faapea foi ma le minisita o le va i fafo a Niu SIla, Winston Peters.
Puna o Faamatalaga: https://www.rnz.co.nz/international/pacific-news/561561/new-caledonia-s-political-future-not-a-pacific-problem-it-s-our-own-says-ponga
