Ua faailoa nei e se Minisita o le Kapeneta a Nauru, o loo iai se faama’i pepesi o le sauāina lea o tinā ma tama’ita’i i le Pasefika.
Ua ta’ua i le RNZ o atunuu mai le Pasefika o loo faatulaga faatasi ma nisi nofoaga aupito i leaga i le lalolagi i le matāupu lea o le sauāina o tina ma tama’ita’i ma e lata i le 70 pasene o tina ma tama’ita’i e aafia i ia sauāga e aofia ai sauāga matagā fai faamalosi.
O le vaiaso na te’a nei na talimalo ai le atunuu o Nauru i le fonotaga faaletausaga lona 6 a le itulagi o loo iai e faatatau i le faataunuuina o auala e puipuia ai aiga aemaise o ni tulafono e faatatau i sauāga i totonu o aiga.
Saunoa la le minisita o tama’ita’i mai lea atunuu e tāua le faamauina o sauāga faasaga i tina ma tama’ita’i o ni faiga faailogatagata ma afai e lē faia iai se faatatau, o se faama’i lava e faaauau ona pepesi ma oia ai le faatemokalasi aemaise o le filemu ma le puipuiga i atunuu.
Fai mai le lipoti e toeitiiti ‘afa o tama’ita’i i Nauru e aafia i ituaiga sauāga eseese e pei ona faamauina i se su’esu’ega na faia i le atunuu i le 2014.
Puna o Faamatalaga: https://www.rnz.co.nz/international/pacific-news/570260/nauru-minister-calls-for-stronger-laws-to-combat-violence-against-women
