O le vaiaso lona lua lenei o loo faagasolo ai le faigāpalota faalotoifale poo faigāmalo laiti, local election.
E pei ona faailoa i luga o nisi o lipoti a o tāpena mai lenei faamoemoe, e to’atele alii ma tama’ita’i mai tupu’aga Pasefika, e silia ma le 60 i latou o loo tausinio ai mo nofoa o pulega faaitumalo i o latou aai.
O nisi o le latou ulua’i taimi lenei o le a tofo ai lea ogasami, ae mo nisi o lea ua toe tauva faalua pe sili atu foi taimi o loo sa’ili avanoa ai i nei tofiga.
Ma o i latou uma nei, faatasi ai foi ma nisi mai isi tupu’aga ae o le latou agaga atoa o le fia saofafa’i i totonu o nei pulega o loo faia ai tonu ma faai’uga fai mo ni fuafuaga auā se manuia o o latou aai ma pitonuu, aemaise lava se manuia mo tatou aiga Pasefika, o tupulaga talavou ma tuaa sinasina mai le Pasefika o lea ua avea nei Niu Sila ma o latou aiga tumau.
E foliga mai o loo aga’i lagona o le to’atele e fia lagolago pea le palota ina ia toe foi mai le alii pulenuu o loo iai i le taimi nei, Wayne Brown.
O loo aumai se fautuaga mai ia i latou o loo faatamo’eina faamoemoe mo nei sui tauva, ina ia silasila lelei i laupapa faailoilo o loo faailoa atu ai ata ma suafa o nei tamalii o le Pasefika o loo tauva, ina ia e lagolago iai poo fea lava le faaitu lena e te alala ai, ae o lau palota mo le aumaia i totonu o sui Pasefika, ina ia latou seei i komiti eseese o nei pulega faalotoifale, o lou sao foi lena i le uuna’ia o se tulaga lelei mo tatou tagata Pasefika i totonu o Niu Sila nei.
O lenei palota e te faia i luga o le pepa palota o le a lafo atu i lau pusameli, ona toe lafo lea i le tuatusi o loo faailoa atu ai, ma o le a tapunia palota uma i le aso 11 o le masina fou o Oketopa 2025.
