Ua iai se isi matāupu tau polokiki ua aofia ai le Palemia o le atunuu o Mongolia ua i’u ai ina folafola i le vaiaso nei lona faamavae mai le tofi i le mae’a o le lua vaiaso o faia pea solo tetee faasaga ia te ia ma lona aiga.
Ta’ua e le CNN ua oo i tupulaga talavou o le atunuu ua aga’i ane i le alatele e faailoa le tetee ma valaau i le Palemia ua tatau ona laa ese ma le tofi.
Ua faailoa na māfua solo tetee ona o ni faamatalaga sa faia i luga o le social media e faatatau i le atalii o le Palemia e 23 tausaga sa faalauiloa lana faamau ma lana paaga ma ua lipotia sa faaaogā ai vaalele helicopter e feavea’i ai tagata, faaali ai ma ato ma mama taugatā ma i’u ai ina fesiligia e le to’atele poo fea e sau ai le mau tamaoaiga ae o loo silafia e le to’atele le Palemia lea i le taimi o lana campaign sa ia ta’ua ai o ia e lē mai se aiga e tele ni tupe.
Ua atili lē fiafia tagata ona o loo feagai le atunuu ma le taugatā o le soifuaga ma le itiiti o tupe maua ae o lea o loo faaaliali solo le sologa lelei o le soifuaga i le aiga o le Palemia.
O solo tetee na faia e to’atele na auai ai ma ua i’u ai ina faailoa mai i le asō le faamavae o le Palemia o Oyun Erdene.
Puna o Faamatalaga: https://edition.cnn.com/2025/06/02/asia/mongolia-political-crisis-protests-intl-hnk
