O le ogatotonu o lenei vaiaso sa momoli atu ai i le nofoaga autū o le vaega faaupufai o le Faatuatua i le Atua Samoa ua Tasi, le sui tauva mo le tofi faaolioli o le itumalo faapalota o Vaimauga 2, ma o se tamalii sa tauva i le fu’a a le vaega faaupufai o le Tautua Samoa i le palota tele o le tausaga 2021.
Peita’i o lea ua ave le lagolago a le afioga Tamaletā Taimang Jensen i le Faatuatua i le Atua Samoa ua Tasi.
O le itumalo palota lea o loo tula’i ai nei i le tofi faipule o le Palemene le tofa Lenata’i Victor Faafoi Tamapua o loo lagolagoina le vaega faaupufai e puipuia aiātatau a tagata.
O se tamalii na ulua’i pale i le tofi o lea itumalo i le palota tele o le tausaga 2011.
O le sui faaolioli o Vaimauga 2 ua momoli atu i le FAST o se tamalii o loo avea ma ta’ita’ifono o le Komiti Faafoe a le Faletupe o Atina’e a le Malo le Samoa Development Bank, ae sa galue ma tautua i nisi o auaunaga tau faletupe i lo tatou atunuu e pei o le ANZ Bank ma le Samoa Commercial Bank.
O ia foi o se tasi o faia’oga i le matāupu o le su’etusi ma le tamaoaiga le accounting and economics i le Iunivesite Aoao o Samoa ma le Kolisi maualuga o Malua Fou.
Sa galue foi le afioga Tamaletā i le Matāgaluega o Tupe a le Malo i ni tausaga ua tuana’i.
