O se tamaitai ma se tinā o le atunuu ua tele tausaga o galue i le malo ua sii lona aao e tauva i le palota tele mo le nofoa o le itumalo faapalota o Gagaemauga 2 i le motu tele i Salafai.
O le afioga Galuvao Matai’a Leota Valma Galuvao o le a tauva mo le pati faaupufai e puipuia aiātatau a tagata, ma o le Aso Lulu o le vaiaso nei na momoli atu ai i Petesa le nofoaga tutotonu o lea vaega faaupufai.
O le itumalo o Gagaemauga Numera 2 sa tula’i mai ai i le tofi faipule i le paeaiga faapalemene ua faatā’ape le tofa Seuamuli Fasi Toma o le vaega faaupufai o le Faatuatua i le Atua Samoa ua Tasi.
O le Aso Lulu foi na momoli atu ai i le Faatuatua i le Atua Samoa ua tasi le sui tauva mo le tofi faaolioli o le itumalo o Lotofaga le susuga Fiaola Iosua Lole.
O le itumalo faapalota lea sa avea ai le Sa’ofaapito le afioga Fiame Naomi Mata’afa ma o latou sui faipule.
Sa avea Fiame ma sui lagolago o le Faatuatua i le Atua Samoa ua Tasi peitai e pei ona silafia ua faamuta e le vaega faaupufai lona toe avea ma sui lagolago o le pati.
