E lē o toe solomuli tapenaga a pati faaupufai mo le isi palota tele a le atunuu e pei ona molimauina i le vaiaso ua mavae, le momoli atu o sui tauva ua faaolioli mo nofoa o itumalo faapalota o le atunuu.
O le vaega faaupufai o le Faatuatua i le Atua Samoa ua Tasi, o le sui tauva tamaitai le tofa Pauli Moana Luamanuvae, ua sii lona aao e tauva i le nofoa o lona itumalo o Faasaleleaga 1, lea o loo tula’i ai i le tofi faipule i le paea’iga o loo iai nei le tasi o tamaitai ma tinā o le atunuu o le Minisita o Faamasinoga, le tofa Matamua Vasati Sili Pulufana.
O le vaiaso foi ua mavae na momoli atu ai foi i lea pati faaupufai le sui faatū mo le tofi faaolioli o le itumalo o Falelatai ma Samatau, le tofa Teleiai Christian Ausage.
O le itumalo lea o loo tula’i mai ai i le taimi nei le afioga Lupematasila Galumalemana Tologata Togia Tile Leia, o loo lagolagoina le vaega faaupufai e puipuia aiātatau a tagata.
I le vaega faaupufai lava lea o loo avea nei ma itu faaupufai o loo agaia le malo, e to’alua o latou sui tauva na momoli atu iai i le faai’uga o le vaiaso ua mavae.
O le afioga i le Tupufia, Faumuina Opapo Soanai, o se tasi o Faamasino o le Faamasinoga o Fanua ma Suafa o ia o se tasi o Pelesetene Lagolago.
O lea tamalii o le Sa’o o lona aiga ma le afio’aga o Lepea, o le a tauva mo le nofoa o le itumalo o Faleata 1 lea o loo tula’i mai ai le tofa Manuleleua Paletasala Tovale o loo lagolagoina le vaega faaupufai o le Faatuatua i le Atua Samoa ua Tasi.
O le itumalo o Faasaleleaga 2 lea o loo tula’i mai ai le sui faipule le afioga Magele Sekati Fiaui o le itu faaupufai o le Faatuatua i le Atua Samoa ua Tasi, o le a tauva mai ai le sui faatū o le vaega faaupufai e puipuia aiātatau a tagata le tofa Vaaelua Sene Samau lea ua mae’a momoli atu i le vaega faaupufai o le a tauva ai.
O tapenaga uma nei a vaega faaupufai autū e lua o loo faagasolo a o faatalitali ai le atunuu i le isi ana palota tele i le tausaga o muamua ai nei 2026.
